සමගි ජන බලවේගයේ මන්ත්‍රීවරුන් පිරිසක්, ශ්‍රී ලංකා පොදුජන පෙරමුණෙන් ස්වාධීන වූ මන්ත්‍රී කණ්ඩායමක්, දෙමළ පක්ෂ නියෝජිත පිරිසක් සහ

පාර්ලිමේන්තු මන්ත්‍රී පාඨලී චම්පික රණවක අතර අද (16) උදෑසන සුහද සාකච්ඡාවක් පවත්වා තිබේ. ඊට මන්ත්‍රීවරියක් ද එක්ව සිටි බව වාර්තා වේ.

රනිල් වික්‍රමසිංහ ගේ ප්‍රධානත්වයෙන් පිහිටුවා ඇති අන්තර්කාලීන ආණ්ඩුවේ ක්‍රියාකාරීත්වය, සිදු කළ යුතු දේශපාලන සහ ආර්ථික ප්‍රතිසංස්කරණ යනාදිය පිළිබඳව මෙහිදී දීර්ඝ වශයෙන් සාකච්ඡාවට ලක්ව තිබේ.

එහිදී ඉදිරි කාලය තුළ මෙම සාකච්ඡාවට සහභාගී වූ කණ්ඩායම් කිහිපය පාර්ලිමේන්තුව තුළ 'එක් හඬක්' ලෙස ක්‍රියාකිරීම සඳහා යෝජනා වී ඇති අතර, ඒ සඳහා එකඟතාවය ද පල වී තිබෙන බව දේශපාලන ආරංචි මාර්ග පවසයි.


'තනතුරු නොගෙන ආණ්ඩුවට සහය දෙනවා' - සජබ මහ ලේකම්


වත්මන් ආණ්ඩුව විසින් ආර්ථිකය ගොඩනැගීම උදෙසා කරනු ලබන, රටට හිතැති යහපත් කටයුතු වෙනුවෙන් එහි තනතුරු ලබා නොගෙන, පාර්ලිමේන්තු ක්‍රියාවලිය තුළින් සමගි ජනබලවේගයේ පූර්ණ සහය ලබා දීමට එහි මන්ත්‍රී කණ්ඩායම අද(16)ඒකමතිකව  තීන්දු කර තිබේ.

මේ මොහොතේ රට පත්ව ඇති අර්බුදකාරී තත්ත්වයෙන් රට මුදවා ගැනීම අත්‍යවශ්‍ය කාරණයක් බව වගකීම් සහගත දේශපාලන පක්ෂයක් ලෙස සමගි ජන බලවේගය විශ්වාස කරන බැවින් මෙම තීන්දුව ගත් බව එහි මහලේකම් රංජිත් මද්දුමබණ්ඩාර  ප්‍රකාශ කළේය.

සමගි ජන බලවේගය නියෝජනය කරන මන්ත්‍රීවරුන් බිලිබා ගැනීමට සහ සමගි ජන බලවේගයේ මූලික ප්‍රතිපත්තියෙන් බැහැරව ආණ්ඩු පාර්ශ්වයට මන්ත්‍රීවරු සම්බන්ධ කර ගැනීමට කටයුතු කරන්නේ නම් අදාල සහයෝගය කොන්දේසි විරහිතව අත්හිටුවන බවටද එහිදී මන්ත්‍රී කණ්ඩායම තීන්දු කර ඇත.

විපක්ෂ නායක සජිත් ප්‍රේමදාස ගේ ප්‍රධානත්වයෙන් කොළඹ මාක්ස් ප්‍රනාන්දු මාවතේ විපක්ෂ නායක කාර්යාලයේ පැවති පාර්ලිමේන්තු මන්ත්‍රී කණ්ඩායම් රැස්වීමේදී මෙම තීරණය ගෙන තිබේ.


“ඇමති ධූර භාර නොගෙන ආණ්ඩුවට සහය දෙනවා” - ගම්මන්පිල


අමාත්‍ය ධූර භාර නොගෙන රට ගොඩනැගීමට ආණ්ඩුවට සහය පළ කිරීමට ස්වාධීන පක්ෂ එකමුතුව තීරණය කළ බව පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල පවසයි.

ඔහු මේ බව සඳහන් කළේ, අග්‍රාමාත්‍ය රනිල් වික්‍රමසිංහ සමග ආණ්ඩුවෙන් ඉවත් වී ස්වාධීන වූ පක්ෂ සමග අද (මැයි 16) පැවති සාකච්ඡාවෙන් අනතුරුව මාධ්‍ය වෙත අදහස් දක්වමිනි.

මෙම සාකච්ඡාවේදී අගමැතිවරයා යෝජනා කළ කමිටු 15ට සම්බන්ධ වෙමින් ජනතා ගැටලු විසඳීමට සහය දෙන බව උදය ගම්මන්පිල සඳහන් කළේ ය.

“එතුමා සඳහන් කළා එතුමා ඉදිරියේදී බලාපොරොත්තු වෙනවා පක්ෂ නායකයින්ගෙන් සැදුම්ලත් ජාතික සභාවක් හදන්න. ඒ වගේ ම පාර්ලිමේන්තුවේ කමිටු 15ක් පිහිටුවලා, ආංශික කමිටු 10ක් සහ මුල්‍ය කමිටු 5ක් වශයෙන් කමිටු 15 පිහිටුවලා ඒ සඳහා ඇමති ධූර භාර ගන්නේ නැති දේශපාලන පක්ෂවල කමිටු සභාපති ධූර භාර ගන්න ආරාධනා කරලා, සියලු ම දෙනා රාජ්‍ය පාලනයට සහභාගී කර ගන්න. අපිට ඇමති ධූර භාර ගැනීමට කෑදරකමක් නැතත් රට ගොඩ නැගීම අවශ්‍යයි. ඒ නිසා අපි ඇමති ධූර භාර ගන්නේ නැතුව රට ගොඩ නැගීම ප්‍රයත්නයට අවංකව සාධාරණව සිට අපේ සහයෝගය ලබා දෙන බව අගමැතිතුමාට දැනුම් දුන්නා.”

 

'' පාඨලීගෙන් අගමැතිට ලිපියක්''

මේ අතර 43 සේනාංකයේ නායක ලෙස පාඨලී චම්පික රණවක විසින් අද අග්‍රාමාත්‍ය රනිල් වික්‍රමසිංහ වෙත ලිපියක් යවා තිබෙනවා.

2022.05.16
ගරු රනිල් වික්‍රමසිංහ මැතිතුමා
ශ්‍රී ලංකා ජනරජයේ අග්‍රාමාත්‍ය
අග්‍රාමාත්‍ය ලේකම් කාර්යාලය
ශ්‍රීමත් අර්නස්ට් ද සිල්වා මාවත,
කොළඹ 07.

ගරු අගමැතිතුමනි,

නැවත වතාවක් රටේ අගමැති ධුරයට පත් ඔබතුමන්ට අපේ සුබ පැතුම් පිරි නමමු. රටේ ආර්ථික හා දේශපාලන අර්බුදයක් උත්සන්න වූ මොහාතක රටේ වගකීම දැරීම අතට ගත යුතු බොහෝ දෙනා විවිධ හේතු දක්වමින් මගහරිද්දී ඒ වෙනුවෙන් ඔබගේ ඉදිරිපත්වීමද අපි අගය කර සිටිමු. එහෙයින් මේ අවස්ථාවේදී ඔබවෙත වැඩිදෙනා  එල්ල කරන සුලබ විවේචන වලින් මිදී මේ අවස්ථාවේදී ඔබ විසින් පැහැදිලි කළ යුතු කරුණු කිහිපයක් සම්බන්ධයෙන් සහ මේ අවස්ථාවේ වැදගත් යැයි අප සිතන යෝජනා කිහිපයක් සම්බන්දයෙන් ඔබගේ අවධානය යොමු කරනු පිණිස පාර්ලිමේන්තුවේ සාමූහිකව කටයුතු කරන මන්ත්‍රී කණ්ඩායමක් වෙනුවෙන් මේ ලිපිය ඉදිරිපත් කිරීමට මම අදහස් කළෙමි.

රට ආර්ථික වශයෙන් බංකොලොත් කිරීමට හේතු වූ රාජපක්ෂ ආණ්ඩුව අනුගමනය කළ වැරදි ආර්ථික ප්‍රතිපත්තිය නිසා උද්ගත වූ ආර්ථික අර්බුදය දේශපාලන අර්බුදයක් බවට පත් වූයේ තරුණයින්ගේ අරගලයත් සමගමය. මේ අරගලය තුල ඉස්මතු වූයේ  ආර්ථික සටන් පාඨ වලටත් වඩා දේශපාලන සටන් පාඨ බව බැහැර කළ නොහැකි යථාර්ථයයකි. රාජපක්ෂවරුන් බලය අත්හැරීම, ප්‍රජාතන්ත්‍රවාදී ආණ්ඩුක්‍රම ව්‍යවස්ථා ප්‍රතිසංස්කරණ හඳුන්වාදීම, දූෂණයට මංකොල්ලයට වැට බැඳීම, අචාරධාර්මිකව හැසිරෙන දේශපාලන ප්‍රජාවක්  ගොඩ නැගීම, ජාති ආගම් භේද වලින් තොර මානව ගරුත්වය සුරැකෙන පුරවැසි ජන රජයක් ගොඩ නැගීම ආදිය මේ සටන් පාඨවල සාරාර්ථය ලෙස දැක්විය හැකිය.  

ඔබ අග්‍රාමාත්‍ය ධුරයට පත් වූයේ එම දේශපාලන අරගලය තීව්‍ර වීමේ ක්‍රියාදාමයක ප්‍රතිපලයක් වශයෙනි. එහෙයින් "ගෝඨාගෝගම" අරගල බිමෙන් මතු වූ දේශපාලන ඉල්ලීම් සම්බන්ධයෙන් ඔබ දක්වන ප්‍රතිචාරය පැහැදිලි, සංගත හා විනිවිද පෙනෙන්නක් ලෙස රට හමුවේ වහාම ඉදිරිපත් විය යුතුය යන්න අපගේ අදහසය. " ගෝඨාගෝගමට ආරක්ෂාව සපයන්නේය" යන සරල ප්‍රකාශයක් ඒ සම්බන්ධයෙන් කිසිසේත්ම ප්‍රමාණවත් නොවේ.

අතැම් නායකයන් මේ අවස්ථාවේ ප්‍රායෝගිකව කළ  නොහැකි මැතිවරණ සහ ජනවරම් ඉල්ලා සිටිද්දී, මේ අර්බුදය විසඳාගැනීම වෙනුවෙන් පාර්ලිමේන්තුව වගකීම අතට ගත් තාවකාලින අන්තර්කාලීන සර්වපාක්ෂික ආණ්ඩුවක් පිහිට විය යුතු බව අප දිගින් දිගටම දැරූ මතයයි.

එහෙයින් එවැනි ආණ්ඩුවක්  බිහිවන්නේ නම් එවැන්නකට සහයෝගය ලබා දීම අපගේ යුතුකමය. ඔබ තුමන් විසින් නායකත්වය දෙන්නට සැරසෙන ආණ්ඩුව එවැනි ආණ්ඩුවක් බවට පත්වීමට නම් තරුණයින්ගේ අරගල බිමෙන් මතු වූ ඉහත දක්වන ලද දේශපාලන ඉල්ලීම් ඉටු කිරීම වෙනුවෙන් ඔබ අදහස් කරන ක්‍රියාමාර්ග හා එහි මාර්ග සිතියම රට හමුවේ තැබීම අත්‍යවශ්‍යය. මෙහිදී පහත දැක්වෙන ප්‍රශ්න සම්බන්ධයෙන් ඔබගෙන් අපි විවෘත පිළිතුරක් බලාපොරොත්තු වෙමු.

01. 2022 මැයි මස 09 වන දින රටපුරා සිදු වූ ප්‍රචණ්ඩ ක්‍රියාවලට මුලපුරමින් "ගෝඨාගෝගම" සාමකාමී උද්ඝෝෂණ භූමියට පහර දුන් ශ්‍රී ලංකා පොදුජන පෙරමුණ පක්ෂයේ මැර දේශපාලන බලවතුන් නීතිය හමුවට පැමිණවීම සදහා ඔබ අනුගමනය කරන ක්‍රියාමාර්ගය කුමක්ද ? එමෙන්ම ඉන් පසු ඇමති මැති ආදී ආණ්ඩු පක්ෂය නියෝජනය කරන දේශපාලන නායකයින්ගේ ජිවිත හා දේපල විනාශ කිරීම් පිලිබදව ඔබතුමා ගන්නා  ක්‍රියාමාර්ගය කුමක්ද ?  

02. ගෝඨාභය රාජපක්ෂ ජනාධිපතිවරයා තම ධුරයෙන් ඉවත් වන දින වකවානු පිළිබඳව ඔබ සමග සාකච්ඡා කර තිබේද? ඒ සම්බන්ධයෙන් ඔබ අනුගමනය කරන ක්‍රියාමාර්ග මොනවද?

03. පාස්කු ප්‍රහාරයට වගකිව යුත්තන් නීතිය හමුවට පැමිණවීම සදහා දැනට සිදු කර තිබෙන විමර්ශන වල අඩුපාඩුකම් ඇති බව පිළිගනිමින් නව ස්වාධින විමර්ශන ක්‍රියාවලියක් අරඹා වින්දිතයන්ට යුක්තිය ඉටු කරදීමට ඔබ අනුගමනය කරන ක්‍රියාමාර්ගය කුමක්ද ?

04. ජනාධිපති බලතල සීමා කරමින් හා ස්වධීන අධිකරණ, පොලිස්, රාජ්‍ය සේවා, මැතිවරණ, විගණන කොමිෂන් සභා ආදිය බල ගැන්වෙන 21 වන ආණ්ඩු ක්‍රම ව්‍යවස්ථා සංශෝධනය කඩනමින් ගෙන ඒමට ඔබ එකඟ වන කාල රාමුව කුමක්ද ?

05. දේශපාලන පක්ෂ වල අභ්‍යන්තර ප්‍රජාතන්ත්‍රවාදය , මූල්‍ය විනිවිදභාවය, සමාජය කෙරෙහි වගවීම සහ මැතිවරණ වලදී විද්‍යුත් ජනමාධ්‍ය වල දේශපාලන පක්ෂපාතිත්වය වැලැක්වීම තහවුරු කෙරෙන මැතිවරණ  නීති ප්‍රතිසංස්කරණයක් කඩිනමින් හඳුන්වාදීමට ඔබ කටයුතු කරන්නේද ?
එසේම පහත සදහන් යෝජනා ඔබගේ අවධානය පිණිස යොමු කරමි.

01. රටට අවශ්‍ය අත්‍යාවශ්‍ය සේවා පවත්වාගැනීම පිණිස හදිසි විදේශ විනිමය ලබා ගැනීම පිණිස ඔබතුමා යෝජනා කරන වැඩපිළිවෙල රට හමුවේ ප්‍රසිද්ධ කල යුතුය.

02. රාජ්‍ය මුල්‍ය ස්ථායිකරණය හා ණය ප්‍රතිව්‍යුහගත කිරීම පිළිබද ඔබතුමාගේ අදහස විවෘතව රට හමුවේ තැබිය යුතුය.

03. තරුණ අරගලකරුවන්ගේ දේශපාලන ඉල්ලීම් මහජන ප්‍රතිපත්ති බවට පත් කරගැනීමට ඉඩ සලසා දෙනු වස් ඔවුන්ගේ නියෝජිතයින්ට පාර්ලිමේන්තු ක්‍රියාදාමය අධීක්ෂණය කළහැකි ව්‍යුහයක් නිර්මාණය කර දෙන ලෙස යෝජනා කර සිටිමි.

04. ඊලග මැතිවරණයට පෙර දුෂණය වැලැක්වීම පිළිබද සිංගප්පුරු හා හොංකොන් රාජ්‍යයන්හි පවත්නා ආකාරයේ දුෂණය මැඩලීමේ යාන්ත්‍රණයක් ස්ථාපිත කලයුතු බව යෝජනා කරමි.

05. ශ්‍රී ලංකා මහා බැංකුව ස්වාධීන ආයතනයක් බවට පත් කොට එය මුළුමනින්ම දේශපාලනීකරණයෙන් බැහැර කොට පාර්ලිමේන්තුවට වග කියන ආයතනයක් බවට පත්කලයුතු යැයි යෝජනා කරමි.

06. රාජ්‍ය බුදධි අංශ හා ආරක්ෂක අංශ දේශපාලන අතකොලු බවට පත් නොවී ඒවා ස්වාධින ලෙස පවත්වාගන යාම තහවුරු කළ යුතු යැයි යෝජනා කරමි.

2015 බල පෙරලියේදී ආර්ථික හා දේශපාලන ක්‍රියාමාර්ග අඩංගු දින 100 වැඩසටහන ඉදිරිපත් කරමින් ඔබ දැක් වූ විවෘතභාවය මේ අවස්ථාවේදීද දැක්විය යුතු බව අපගේ අදහසය. එබැවින් ඔබ විසින් පිහිටුවන අන්තර්කාලීන ආණ්ඩුවේ දේශපාලන හා ආර්ථික මාර්ග සිතියම කඩිනමින් අප වෙත පැහැදිලි කරනා  ලෙස ඉල්ලා සිටිමු. එය දෙස බලා ඔබගේ රජයට කවර මට්ටමින් අපගේ සහයෝගය ලබා දෙන්නේද යන්න අපි තීරණය කරනා බව ගෞරවයෙන් ප්‍රකාශ කර සිටිමු.

පා.ම. පාඨලී චම්පික රණවක.
නායක,
43 සේනාංකය.

නවතම ලිපි